Föstudaginn 19. febrúar kl. 20 flytja stórsöngvararnir Elín Ósk Óskarsdóttir, sópran, og Jóhann Friðgeir Valdimarsson, tenór, ásamt Hörn Hrafnsdóttur, mezzósópran, valda kafla úr einni ástsælustu óperu allra tíma; Aidu eftir Giuseppe Verdi, í Íslensku óperunni. Tekinn er fyrir ástarþríhyrningur aðalsöguhetjanna í óperunni; elskendanna Aidu, Radamesar og Amnerisar, og verða fluttar þekktustu aríur og samsöngvar óperunnar. Meðal þekktra kafla úr Aidu má nefna aríurnar Celeste Aida og Ritorna vincitor, auk dúettsins O terra, addio.

Meðleikari á píanó er Antonía Hevesi.

Fimmtu hádegistónleikar Óp-hópsins í Íslensku óperunni í vetur verða þriðjudaginn 23. febrúar kl. 12.15. Fram koma allir meðlimir hópsins, en  sérstakur gestur á tónleikunum er Hrólfur Sæmundsson barítónsöngvari, sem syngur um þessar mundir við óperuhúsið í Aachen.

Miðaverð er aðeins 1.000 kr. og taka tónleikarnir um 40 mínútur í flutningi. Gestir geta keypt samlokur, sælgæti og drykki í anddyri Íslensku óperunnar fyrir og eftir tónleikana.

Opnunartíma miðasölu Íslensku óperunnar hefur verið breytt. Opið er alla virka daga kl. 14-18, og símasala frá kl. 10. Um helgar er opið kl. 12-18. Opið er fram að sýningu á sýningarkvöldum.
Sími í miðasölu er 511-4200, en netmiðasalan á www.opera.is er opin allan sólarhringinn! 

Með því að smella hér má sjá nokkrar stórskemmtilegar myndir úr uppfærslu Íslensku óperunnar á Ástardrykknum - enda er hér um bráðskemmtilega sýningu að ræða! Ljósmyndari er Gísli Egill Hrafnsson.