Rigoletto

eftir Giuseppe Verdi
Frumsýning 9. október 2010

Um sýninguna

Tónskáld Giuseppe Verdi   Líbrettó Francesco Maria Piave   Tungumál Ítalska   Þættir 3   Hlé 1

Þetta áhrifamikla og hádramatíska meistaraverk er ein af þekktustu óperum sögunnar og er reglulega færð upp í flestum óperuhúsum veraldar. Í verkinu koma saman ástir, valdabarátta og örlög í æsispennandi fléttu, sem römmuð er inn af hrífandi tónlist meistara Verdis og inniheldur meðal annars hinar þekktu aríur „La donne e mobile“, „Questa o quella“ og „Caro nome“, að ógleymdum kvartettinum „Bella figlia de...ll’amore“.

Aðalsöngvararnir í verkinu eru íslenskum óperuunnendum að góðu kunnir, en þeir eru Ólafur Kjartan Sigurðarson sem Rigoletto, en hann hefur haslað sér völl sem einn fremsti óperusöngvari Íslands á erlendri grundu undanfarin misseri, Þóra Einarsdóttir sem Gilda og Jóhann Friðgeir Valdimarsson sem Hertoginn af Mantua. Í öðrum hlutverkum eru Jóhann Smári Sævarsson sem Sparafucile, Sesselja Kristjánsdóttir sem Maddalena og Bergþór Pálsson sem Monterone, auk þess sem Bylgja Dís Gunnarsdóttir, Ágúst Ólafsson, Hlöðver Sigurðsson og Bragi Jónsson syngja minni hlutverk.

Í Rigoletto segir af söguhetjunni Rigoletto sem starfar fyrir hinn illræmda kvennabósa, hertogann af Mantua. Rigoletto aðstoðar hertogann við að koma á fláráðum ástarævintýrum við konur; ýmist saklausar, giftar eða kornungar, en um leið heldur hann þeirri staðreynd leyndri, að hann á sjálfur dóttur, unga og fagra sem hann ann meira en öllu öðru. Þegar Rigoletto tekur sjálfur þátt í brottnámi dóttur sinnar án þess að gera sér grein fyrir hver á í hlut og kemst að hinu sanna, leggur hann á ráðin um að láta myrða hinn ósvífna hertoga og flýja ásamt dóttur sinni, en ráðabrugg hans tekur óvænta stefnu og endar með skelfingu. 

Listrænir aðstandendur sýningarinnar eru Stefán Baldursson sem leikstýrir, Þórunn Sigríður Þorgrímsdóttir sem hannar leikmynd, Filippía Elísdóttir hannar búninga og Páll Ragnarsson lýsingu. Hljómsveitarstjóri verður Daníel Bjarnason, handhafi tveggja verðlauna á Íslensku tónlistarverðlaununum í ár. Alls eru sex sýningar ráðgerðar á verkinu og er frumsýning laugardaginn 9. okótóber kl. 20.

Myndir

  • Rigoletto x_D1J2764.jpg
  • Rigoletto x_D1J2020.jpg
  • Rigoletto x_D1J2115