Peter Grimes

eftir Benjamin Britten
Frumsýning 22. maí 2015

Um sýninguna

Tónskáld Benjamin Britten   Líbrettó Montagu Slater   Tungumál Enska   Þættir 3   Hlé 1

Benjamin Britten var eitt mesta óperutónskáld 20. aldar. Á Listahátíð hljómar Peter Grimes í fyrsta sinn á Íslandi. Þetta var fyrsta stóra ópera höfundarins, samin 1945, og strax þótti ljóst að hér væri komin ein af merkustu óperum 20. aldar. Í verkinu kannar Britten hin óljósu mörk milli sakleysis og sektar, og stöðu einstaklingsins í þjóðfélaginu. Peter Grimes er ógæfusamur skipstjóri í smábæ. Þegar ungir piltar sem hann ræður sér til aðstoðar taka að týna lífinu hver á eftir öðrum taka bæjarbúar að ofsækja hann, með átakanlegum afleiðingum. Tónlistin er lagræn og aðgengileg, ýmist gamansöm eða hádramatísk eins og efnið býður upp á. Hér er stórviðburður í íslensku tónlistarlífi.

Ástralski „hetjutenórinn“ Stuart Skelton er á hátindi ferils síns um þessar mundir. Hann var kosinn karlsöngvari ársins á International Opera Awards 2014 og tilnefndur til hinna hinna virtu Olivier-verðlauna fyrir túlkun sína á Peter Grimes við Bresku þjóðaróperuna. Hann hefur einnig sungið verkið með Lundúnafílharmóníunni og á Proms-tónlistarhátíðinni og er það mat gagnrýnenda að sjaldan hafi nokkur farið með hlutverk sjóarans ólánssama af sömu snilld.

Daníel Bjarnason hefur unnið stóra sigra á undanförnum árum, bæði sem tónskáld og hljómsveitarstjóri. Síðast stjórnaði hann Sinfóníuhljómsveit Íslands á Myrkum músíkdögum 2014 við frábærar undirtektir og nú tekst hann á við eina dáðustu óperu 20. aldar í tónleikauppfærslu.

Uppfærslan er samstarf Íslensku óperunnar, Hörpu, Sinfóníuhljómsveitar Íslands og Listahátíðar í Reykjavík.

Myndir

  • Peter Grimes 04
  • Peter Grimes 05
  • Peter Grimes 08
  • Peter Grimes 07
  • Peter Grimes 02
  • Peter Grimes 01

Listrænir stjórnendur