The Rake's Progress

eftir Igor Stravinsky
Frumsýning 9. febrúar 2007

Um sýninguna

Tónskáld Igor Stravinsky   Líbrettó W. H. Auden, Chester Kallman   Tungumál Enska   Þættir 3   Hlé

Óperan Flagari í framsókn eða The Rake´s Progress byggir á átta lítógrafíum eftir William Hogarth frá árunum 1733-1735, sem lýsa falli hins unga Tom Rakewell. Óperan var frumsýnd í Feneyjum árið 1951 og hefur síðan þá verið sýnd reglulega víða um heim, en þetta er í fyrsta sinn sem að verkið er sett upp á Íslandi.

Óperan hefst þar sem ungur maður Tom Rakewell er að trúlofast Anne Trulove þrátt fyrir að faðir hennar hafi áhyggjur af því hvernig Tom ætlar að sjá fyrir henni. Tom vill láta slag standa og teysta á að heppnin verði sér hliðholl. Þá birtist Nick Shadow sem tjáir honum að hann hafi erft allmikil auðæfi eftir óþekktan frænda og býðst til að gerast þjónn hans. Tom bítur á agnið en vegferð hans liggur eftir það til glötunnar þar sem freistarinn í líki Nicks kynnir hann fyrir heimsins löstum og sífellt hallar undan fæti. Nick fær hann til að kvænast skeggjuðu konunni Böbu aðeins til að skemmta skrattanum. En Anne hefur aldrei hætt að elska hann og að lokum finnur hún hann á geðveikarahæli og hann heldur sig vera Adonis og hún sé Venus. Hún syngur hann í svefn og yfirgefur hann síðan hljóðlega og þegar hann verður var við að hún er farin þá deyr hann.

Gunnar Guðbjörnsson, tenór, syngur hlutverk flagarans, Tom Rakewell en hin saklausa og hreina Anne Trulove er sungin af Huldu Björk Garðarsdóttur, sópran. Í hlutverki djöfulsins, Nick Shadow, er Ágúst Ólafsson, baritón og Jóhann Smári Sævarsson, bassi, syngur hlutverk föður Anne. Ingveldur Ýr Jónsdóttir, mezzósópran, syngur hlutverk hinnar skeggjuðu Böbu sem Tom giftist á vegferð sinni. Sigríður Aðalsteinsdóttir, mezzósópran, syngur hlutverk Mother Goose, sem er eigandi hóruhúss í London þangað sem Tom leggur leið sína. Eyjólfur Eyjólfsson, tenór, syngur hlutverk Selims uppboðshaldara sem sér um að selja allar eigur Toms þegar allt er komið í óefni.

Hljómsveitarstjóri er Kurt Kopecky og leikstjóri Halldór E. Laxness. Leikmyndina hannar Axel Hallkell Jóhannesson og búninga hannar Filippía Elísdóttir. Ljósahönnuður er Björn Bergsteinn Guðmundsson og danshöfundur er Ástrós Gunnarsdóttir. Kór Íslensku óperunnar sem tekur þátt í sýningunni samanstendur af 16 söngvurum og í hljómsveitinni eru 37 hljóðfæraleikarar.

Hlutverk

Tom Rakewell
Gunnar Guðbjörnsson
Nick Shadow
Ágúst Ólafsson
Trulove, faðir Anne
Jóhann Smári Sævarsson
Sellem, uppboðshaldari
Eyjólfur Eyjólfsson

Listrænir stjórnendur

Hljómsveitarstjóri
Kurt Kopecky
Leikstjóri
Halldór E. Laxness
Leikmyndahönnuður
Axel Hallkell Jóhannesson
Búningahönnuður
Filippía Elísdóttir
Danshöfundur
Ástrós Gunnarsdóttir