eftir Richard Strauss
Frumsýning 4. október 2007

Um sýninguna

Tónskáld Richard Strauss   Líbrettó Hugo von Hofmannsthal   Tungumál Þýska   Þættir 2   Lengd 155 mínútur   Hlé 1

Fyrsta frumsýning vetrarins hjá Íslensku óperunni, Ariadne (Ariadne á Naxos) eftir Richard Strauss, lítur dagsins ljós þann 4. október næstkomandi og koma hvorki meira né minna en sextán íslenskir einsöngvarar fram í sýningunni. Það er fátítt að óperur skarti svo mörgum einsöngshlutverkum og gefst því kjörið tækifæri til að heyra og sjá fjölda íslenskra söngvara í einni og sömu sýningunni. Hér er um að ræða bæði nokkra af þekktustu óperusöngvurum Íslands, sem starfa víða um heim við góðan orðstír, sem söngvara af yngri og upprennandi kynslóðinni, sem mikils mávænta af í framtíðinni.

Í helstu hlutverkum eru Hanna Dóra Sturludóttir sem Ariadne, Arndís Halla Ásgeirsdóttir sem Zerbinetta, Guðrún Jóhanna Ólafsdóttir sem Tónskáldið, Kolbeinn Ketilsson sem Bakkus, Ágúst Ólafsson sem Harlekin og Bergþór Pálsson sem Tónlistarkennarinn, auk þess sem leikarinn Ingvar E. Sigurðsson fer með hlutverk Ráðsmannsins. Ingvar fer með hlutverk sitt á íslensku, meðan söngvararnir syngja upphaflega textann á þýsku.

Þetta er í fyrsta sinn sem óperan Ariadne á  Naxos er sett upp á Íslandi, og að öllum líkindum í fyrsta sinn sem ópera eftir Richard Strauss er sett upp hérlendis. Richard Strauss (1864-1949) skildi eftir sig fimmtán óperur alls, þar af nokkrar sem reglulega eru settar upp í óperuhúsum víða um heim, m.a.: Salome, Elektra, Der Rosenkavalier, Die ägyptische Helena og Capriccio. Nafnsins vegna er Richard stundum ruglað saman við nafna sinn Johann, höfundar hinnar vinsælu óperu Die Fledermaus. Þeir eiga þó ekki margt sameiginlegt!

Leikstjóri sýningarinnar er hinn þýski Andreas Franz. Þetta er í fyrsta sinn sem hann starfar við Íslensku óperuna, en hann á heiðurinn að mörgum glæsilegum óperusýningum víða um heim. Axel Hallkell Jóhannesson leikmyndahönnuður setur nú þriðju sviðsmynd sína á svið Íslensku óperunnar í ár, en hann átti heiðurinn að glæsilegri leikmynd óperunnar Flagara í framsókn, sem sett var upp síðastliðið vor og leikmynd íslensku óperunnar Galdra-Lofts. Búninga hanna Dýrleif Ýr Örlygsdóttir og Margrét Einarsdóttir, sem löngu eru landskunnar í íslenskum tísku- og leikhúsheimi, en starfa nú í fyrsta sinn við Íslensku óperuna. Hljómsveitarstjórn er í höndum Kurts Kopecky, tónlistarstjóra Íslensku óperunnar, og lýsingu hannar Björn Bergsteinn Guðmundsson.

Óperan Ariadne er í tveimur þáttum, og skiptist hún í Forleik fyrir hlé og Óperuna eftir hlé. Textann við óperuna samdi Hugo von Hofmannsthal.  

Myndir

  • Ariadne 8745.jpg
  • Ariadne 8576.jpg
  • Ariadne 8563.jpg
  • Ariadne 8546.jpg
  • Ariadne 8518.jpg
  • Ariadne 8508.jpg

Listrænir stjórnendur

Leikstjóri
Andreas Franz
Hljómsveitarstjóri
Kurt Kopecky
Aðstoðarhljómsveitarstjóri
Daníel Bjarnason
Leikmyndahönnuður
Axel Hallkell Jóhannesson
Búningahönnuður
Dýrleif Ýr Örlygsdóttir
Búningahönnuður
Margrét Einarsdóttir
Konsertmeistari
Sigrún Eðvaldsdóttir