Hans og Gréta tilnefnd sýning ársins á Verðlaunahátíð barnanna

29. maí 2019 | Fréttir og tilkynningar

SÖGUR - Verðlaunahátíð barnanna

SÖGUR – verðlaunahátíð barnanna fer fram í sjónvarpssal RÚV sunnudaginn 2. júní n.k. og verður að sjálfsögðu sýnt í beinni útsendingu. Á þessum stórviðburði í anda Kids’ Choice Awards verðlauna íslensk börn allt það sem þeim finnst standa upp úr í menningarlífinu. Þetta er verðlaunahátíð eins og börn vilja sjá hana, fyndin og fjörug – og langar ræður eru stranglega bannaðar.

Verðlaun verða veitt fyrir tónlist, leiklist, sjónvarp og síðast en ekki síst barnabókmenntir. Krakkar á aldrinum 6-12 ára um allt land hafa kosið sitt uppáhald og þau ráða! Á hátíðinni verður einnig afhend Heiðursverðlaun Sagna og Bókmenntaverðlaun barnanna auk þess sem ungir rithöfundar, leikskáld og kvikmyndagerðarmenn hljóta verðlaun.

Uppfærsla Íslensku óperunnar, Hans og Gréta, er meðal tilnefndra verka en úrslitin verða sýnd í beinni útsendingu á RÚV. Að útsendingunni standa SÖGUR – samtök um barnamenningu í samstarfi við KrakkaRÚV, SÍUNG, Barnamenningarhátíð í Reykjavík, Reykjavík bókmenntaborg UNESCO, Borgarbókasafnið, Bókasöfn Íslands, Borgarleikhúsið, Leikfélag Akureyrar, Menntamálastofnun og Skóla- og frístundasvið Reykjavíkur.