Þórunn Sigþórsdóttir

leikstjóri

Þórunn Sigþórsdóttir

Þórunn nam söng við Söngskólann í Reykjavík hjá Ólöfu Kolbrúnu Harðardóttur. Hún lauk Diploma prófi frá Tónlistarháskólanum í Trossingen í suður Þýskalandi hjá Próf. M.Moldenhauer. Næstu tvö ár eftir stundaði hún söngnám hjá Evu Randovu óperusöngkonu og Willem Wentzel stjórnanda við Óperuhúsið í Stuttgart.

Þórunn tók meistaragráðu við International Opera Academy í Ghent, Belgíu, í óperusöng og leikstjórn undir handleiðslu Guy Joosten, einum fremsta óperuleikstjóra Belga. Þórunn var í framhaldinu aðstoðarleikstjóri hjá Guy Joosten í „Luisu Miller“ eftir Verdi við Óperuhúsið í Antwerpen.

Þórunn var einnig aðstoðarleikstjóri hjá Sue Dunderdale, í „Bottle Universe“ eftir Simon Burt í Bush Theater, London,  hjá Þórhildi Þorleifsdóttur í „Virkjuninni“ eftir Elfriede Jelinek, gríska leikstjóranum Giorgios Zamboulakis í „Bakkynjum“ Evripides og Ágústu Skúladóttur í „Stórfengleg“ eftir Peter Quilter, allt í Þjóðleikhúsinu. Þá vann hún með Kolbrúnu Halldórsdóttur í „Happy End“ eftir Kurt Weil sem var sett upp í Sumaróperunni.

Leikstjóraverkefni Þórunnar fela meðal annars í sér söngleikina „ Footloose“, „Hárið“, „ Grease“og „Söngvaseið“. Auk þess hefur Þórunn leikstýrt leikritunum  „Þar sem Djöflaeyjan“ rís eftir Einar Kárason og Kjartan Ragnarson og „Korter“ eftir Kristínu Guðnadóttur. Þórunn starfaði með Íslenska sönglistahópnum bæði sem söngkona og leikstjóri í verkefnunum „Ástin á konudegi“ og „Fagra Veröld“. Auk þess að leikstýra hefur Þórunn verið með leiklistarnámskeið fyrir börn og unglinga.

Þórunn hefur komið fram í uppfærslum og tónleikum bæði hér heima og í Þýskalandi, Belgíu, Hollandi og Bretlandi.

Verkefni hjá ÍÓ