Um Íslensku óperuna

Íslenska óperan setur reglulega upp vandaðar og spennandi óperusýningar, þar sem íslenskir listamenn eru í forgrunni en jafnframt er erlendum listamönnum reglulega boðið að taka þátt í uppfærslum hennar.

Íslenska óperan hefur öðlast mikilvægan sess í menningarlífi þjóðarinnar. Hún hefur áunnið sér mjög gott orðspor bæði innanlands og erlendis fyrir vandaða listviðburði sem standast alþjóðlegan samanburð.

Frá því að Íslenska óperan var stofnuð hafa yfir 400.000 manns séð sýningar hennar sem nálgast nú að vera orðnar tæplega 90 talsins. Verkefnavalið hefur verið mjög fjölbreytt, allt frá  klassískum óperum til nýrra verka íslenskra samtímatónskálda.

Starfsár Óperunnar er frá september fram í júní og frumsýnir hún í það minnsta 2 nýjar uppfærslur á hverju starfsári auk samstarfverkefna og tónleikahalds.

Kúnstpásan eru hádegistónleikar sem haldnir eru mánaðarlega án endurgjalds. Þar koma fram margir af ástsælustu söngvurum þjóðarinnar ásamt þeim yngri sem eru að kynna sig til leiks á óperusviðinu.

Söngurinn á mikla hlutdeild í hjörtum landsmanna og á hann greiðan aðgang að íslenskum áheyrendum sem hafa sýnt Íslensku óperunni mikinn áhuga og tryggð. Þúsundir landsmanna koma á viðburði Óperunnar árlega.

Sýningar Óperunnar og flytjendur þeirra hafa hlotið mörg verðlaun og viðurkenningar og má þar nefna óperuna Ragnheiði eftir Gunnar Þórðarson sem var valin sýning ársins árið 2014 og hlaut 10 tilnefningar alls. Nýverið hlaut uppfærsla Óperunnar á Évgeny Onegin eftir Tchaikovsky 5 stjörnu dóma bæði hér heima og í virtum erlendum fagtímaritum s.s. Opera now, auk þess sem sýningin var valin Tónlistarviðburður ársins 2016  hjá Íslensku tónlistarverðlaununum.

Eftirfarandi uppfærslur hafa verið sýndar eftir að Íslenska óperan flutti inn í Hörpu:

Töfraflautan eftir Mozart

La Boheme eftir  Puccini

Il trovatore eftir Verdi

Carmen eftir Bizet

Ragnheiður eftir Gunnar Þórðarsson

Don Carlo eftir Verdi

Peter Grimes eftir Britten

Rakarinn frá Sevilla eftir Rossini

Don Giovanni eftir Mozart

Évgení Onegin eftir Tchaikovsky

Mannsröddin eftir Poulenc

Næsta uppfærsla:

Tosca eftir Puccini frumsýnd 21.10. 2017



 

harpa-web.jpg