FRUMSÝNING 9. APRÍL (ANNAR Í PÁSKUM) KL. 17
Hin vinsæla ópera Cavalleria Rusticana eftir Mascagni verður frumsýnd í Íslensku óperunni á annan í páskum. Uppsetningin er samstarfsverkefni Íslensku óperunnar og Óperukórs Hafnarfjarða og Elín Ósk Óskarsdóttir, stjórnandi kórsins, sem fagnar tuttugu ára starfsafmæli sínu í ár syngur hlutverk Santuzzu. Aðrir einsöngvarar eru Jóhann Friðgeir Valdimarsson, Ólafur Kjartan Sigurðarson Hörn Hrafnsdóttir og Þórunn Stefánsdóttir. Á sjöunda tug kórmeðlima úr Óperukór Hafnarfjarðar taka einnig þátt í sýningunni ásamt rúmlega fjörtíu manna hljómsveit Íslensku óperunnar.

Hljómsveitarstjóri er Kurt Kopecky og leikstjóri Ingólfur Níels Árnason. Þetta er í fyrsta sinn sem Íslenska óperan setur þessa vinsælu óperu á fjalirnar en hún var sýnd í Þjóðleikhúsinu fyrir rúmlega fimmtíu árum. Sagan er sikileysk ástarsaga þar sem ástir og afbrýðisemi eru í aðalhlutverki. Tónlistin úr óperunni hefur notið mikilla vinsælda frá því hún var frumflutt árið 1890 bæði á óperusviðinu sem og í kvikmyndum og ýmis konar sjónvarpsefni og ættu flestir að kannast við brot úr verkinu. „Páskakórinn“ svokallaði úr Cavalleria Rusticana er reglulega fluttur af kórum um allt land á páskahátíðinni en óperan gerist einmitt á páskadag. Það er því vel við hæfi að frumsýna þetta meistarverk óperubókmentanna á annan í páskum.  

ÓPERUKÓR HAFNARFJARÐAR

Óperukór Hafnarfjarðar var stofnaður árið 2000 af Elínu Ósk Óskarsdóttur óperu­söng­konu sem jafnframt hefur verið aðalkórstjóri hans frá upphafi. Kjartan Ólafsson er aðstoðarkórstjóri og píanóleikari er Peter Máté. Félagar eru 70 talsins, tónlistarfólk af ýmsum toga, lærðir söngvarar, söngkennarar, hljóðfæraleikarar og einnig fólk með mikla reynslu af kórsöng. Formaður kórsins er Björg Karítas Jónsdóttir. Verndari Óperukórs Hafnarfjarðar er Frú Þuríður Pálsdóttir söngkona.

Myndin hér til hægri var tekin á æfingu kórsins á Cavalleria Rusticana á dögunum.

Kórinn hefur frá upphafi sérhæft sig í flutningi á óperu- og Vínartónlist sem hann hefur flutt bæði innanlands og utan og eru félagar samkvæmisklæddir við þau tækifæri. Kórinn hefur einnig veglega íslenska dagskrá á takteinum og klæðist þá gjarnan íslenskum búningi við flutning hennar erlendis, til kynningar á íslenskri menningarhefð.

Kórinn hefur gjarnan komið fram með kórstjóranum Elínu Ósk í hlutverki söngkonunnar og Kjartani aðstoðarkórstjóra sem einsöngvara. Margir landsþekktir listamenn hafa einnig komið að tónleikahaldi kórsins, bæði einsöngvarar og aðrir hljómlistarmenn.

Hróður kórsins hefur farið víða, en hæst ber flutning kórsins og Fílharmoníu­hljómsveitar Sofiuborgar á þekktum óperuverkum á sviði Filharmoníunnar þar í borg.  Einsöngvari var Elín Ósk Óskarsdóttir og hljómsveitarstjóri Bernharður Wilkinson.  Gala-Vínarkvöld kórsins er orðinn árlegur viðburður þar sem boðið er upp á allt það besta sem völ er á í mat, drykk og skemmtidagskrá. Jólatónleikar í Hafnarborg og Víðistaðakirkju eru að jafnaði á dagskrá kórsins auk tónleikahalds á landsbyggðinni. 

Í maí 2006 hélt Elín Ósk Óskarsdóttir upp á 20 ára starfsafmæli sitt sem óperusöngkona og átti Óperukór Hafnarfjarðar stóran þátt í þeim tónleikum ásamt þjóðþekktum ein­söngvur­um og leikurum. Í það sinn var Kurt Kopecky stjórnandi tónleikanna.

Hjá Óperukór Hafnarfjarðar eru mörg spennandi verkefni framundan næstu árin, bæði hérlendis og erlendis. Aðalverkefni kórsins núna árið 2007 er hins vegar samstarfsverkefni Óperukórs Hafnarfjarðar og Íslensku óperunnar, óperan Cavalleria Rusticana og er það frumraun kórsins í uppfærslu óperu á sviði.