|
Íslenska óperan stendur fyrir Óperustúdíói þriðja árið í röð, þar sem nemendur tónlistarskóla á höfuðborgarsvæðinu fá tækifæri til að taka þátt í óperusýningu sem er að öllu leyti unnin eins og aðrar sýningar Íslensku óperunnar. Glitnir kemur að kostun verkefnisins annað árið í röð. Það er óhætt að segja að verkefnið hafi fest sig í sessi sem eitt af stærri verkefnum Óperunnar og reynsla síðustu tveggja ára hefur sýnt að það er mikill áhugi fyrir verkefninu bæði meðal þátttakenda sem og áhorfenda. Á síðasta ári sáu yfir 1.500 manns sýningu Óperustúdíósins á Apótekaranum eftir Haydn og í ár mættu rúmlega 50 söngnemendur í áheyrnaprufur vegna verkefnis vetrarins en það er óperettan Nótt í Feneyjum eftir Johann Strauss sem verður frumsýnd 29. mars.
Bjarni Daníelsson segir það einstaklega ánægjulegt hversu mikið af ungu hæfileikafólki mætti í áheyrnaprufur vegna verkefnisins í ár. „Það lofar góðu um framtíðina og það er gott að geta veitt þessu unga hæfileikafólki mikilvæga reynslu og samtímis boðið áhorfendum upp á glæsilega óperusýningu”. Bjarni Ármannsson segir það mikinn heiður fyrir Íslandsbanka að koma að þessu verkefni með Íslensku óperunni. ”Það er mikið af hæfileikaríku tónlistarfólki og mikivægt að veita því tækifæri til að spreyta sig á sviði. Uppsetning síðasta árs tókst vel og því er ánægjulegt að koma aftur að þessu verkefni.”
Óperustúdíóið frumsýnir óperettuna Nótt í Feneyjum 29. mars á næsta ári og alls verða sex sýningar. Leikstjóri er Uschi Horner, sem kemur frá Austurríki. Hljómsveitarstjóri er Daníel Bjarnason, en umsjón með Óperustúdíóinu hefur Kurt Kopecky tónlistarstjóri Óperunnar. Auk einsöngvara og kórs verður stór hljómsveit. Þátttakendur verða um það bil 80 nemendur og er það viðamesta verkefni Óperustúdíósins til þessa. Verkefnið er unnið í nánu samstarfi við þá tónlistarskóla sem þátttakendur stunda nám við.
Einsöngvarar í Nótt í Feneyjum eru:
Egill Árni Pálsson, Hugi Jónsson, Þorsteinn Freyr Sigurðsson ,Magnús Guðmundsson, María Jónsdóttir, Hanna Þóra Guðbrandsdóttir, Svanlaug Árnadóttir, Sibylle Köll, Herdís Anna Jónasdóttir, Arnbjörg María Daníelsen, Rúnar Þór Guðmundsson, Ásgeir Páll Ágústsson, Sólveig Elín Þórhallsdóttir,Hrafnhildur Ólafsdóttir og Jón Leifsson. |
