Hádegistónleikaröð starfsársins 2004-2005 í Íslensku óperunni hefst þriðjudaginn 26. október kl. 12.15. Alls verða fernir tónleikar í röðinni, tvennir á haustmisseri og tvennir á vormisseri. Leitin að Rómeó er yfirskrift fyrstu tónleikanna, þriðjudaginn 26. október, en þar flytja þau Hulda Björk Garðarsdóttir og Kurt Kopecky aríur og söngva úr óperum og söngleikjum sem eiga það sameiginlegt að fjalla um elskendurna Rómeó og Júlíu. Gestir á tónleikunum verða Maríus Sverrisson söngvari og Hallgrímur Helgason rithöfundur. Hádegistónleikaröðin er haldin í samstarfi við MasterCard – og var samstarfssamningur um kostun verkefnisins undirritaður í Íslensku óperunni mánudaginn 25. október.

Leikrit Shakespeares um Rómeó og Júlíu hefur orðið mörgum tónskáldum innblástur, eins og svo sem þeim Gounod (Rómeó og Júlía), Bellini (I Capuleti e i Montecchi) og Bernstein (West Side Story). Á tónleikunum verður gripið niður í verk þeirra á mismunandi stöðum í sögunni, jafnt í tónum sem tali. Um tónana sjá þau Hulda Björk, Maríus og Kurt en inn á milli mun Hallgrímur leyfa gestum að njóta þýðingar sinnar á verki Shakespeares. 

Tónleikarnir standa í um 40 mínútur, svo auðvelt ætti að vera fyrir þá sem starfa eða búa í nágrenni miðbæjarins að bregða sér á tónleika í hádegishléi og halda svo á ný út í daginn endurnærðir af fagurri tónlist. Hægt er að kaupa samlokur í anddyri fyrir eða eftir tónleika, svo enginn ætti að þurfa að fara svangur úr Óperunni. Aðgangseyrir: 1.000 kr.

Aðrir hádegistónleikarnir í röðinni verða þriðjudaginn 23. nóvember. Þá flytur Ágúst Ólafsson ljóð og lög eftir Schubert, sem öll tengjast með einum eða öðrum hætti fiskimönnum eða sæfarendum, við píanóundirleik Izumi Kawakatsu.

Eftir áramót verður þráðurinn aftur tekinn upp þriðjudaginn 15. febrúar, en þá flytur Marta Hrafnsdóttir barokktónlist ásamt Sigurði Halldórssyni á selló og Kurts Kopecky, sem leikur á píanó.   

Tveir bassar og annar með strengi er svo yfirskrift síðustu tónleikanna í þessari röð, þriðjudaginn 15. mars, en þar verða flytjendur þeir Davíð Ólafsson bassasöngvari og Dean Ferrell kontrabassaleikari. Þeim til aðstoðar verður Kurt Kopecky á píanó. Svo ótrúlega vill til að bæði Mozart og Bach skrifuðu ástarsöngva fyrir kontrabassa og bassasöngvara. Mozart skrifaði fjörlega konsertaríu um hina fallegu kvenhönd, Per questa bella mano. Bach aftur á móti samdi litla kantötu um svikular ástir, Amore traditore. Bæði eru tónverkin fjörmikil og einstakt að fá að heyra þau saman á tónleikum. Að auki verða fluttar þekktar aríur þar sem kontrabassinn fær aðeins að keppa við bassasöngvarann.

MasterCard kostar hádegistónleikana 

Hádegistónleikaröðin er haldin í samstarfi við MasterCard – og var samstarfssamningur um kostun verkefnisins undirritaður í Íslensku óperunni mánudaginn 25. október. MasterCard hefur um langt árabil verið í hópi traustustu samstarfsfyrirtækja Íslensku óperunnar. Samningurinn sem nú er gerður felur m.a. í sér kynningu á MasterCard í tengslum við röðina og 20% afslátt á hádegistónleikana fyrir korthafa MasterCard. Þetta er í annað sinn sem MasterCard kostar hádegistónleikaröð Óperunnar og þar sem báðir aðilar höfðu afar góða reynslu af samstarfinu í fyrra sinnið var ákveðið að endurnýja samninginn fyrir þetta starfsár.