Septemberhefti Óperublaðsins er komið út og hefur verið dreift til félagsmanna í Vinafélagi Íslensku óperunnar, samstarfs- og styrktarfyrirtækja Óperunnar og víðar, auk þess sem það verður til sölu í Óperunni.

Meðal efnis í blaðinu er umfjöllun um það helsta sem er á dagskrá Óperunnar á haustmisseri ásamt viðtölum við söngvara, viðtali við virkan félagsmann í Vinafélaginu og grein um það sem efst er á baugi hjá ítölsku óperuhúsunum. Ennfremur er þar að finna greinar um Wagnerhátíðina í Bayreuth og starfsemi Óperustúdíós Austurlands og Sumaróperu Reykjavíkur. Viðtal er einnig við Friðrik Sophusson, forstjóra Landsvirkjunar, um samstarf og samspil menningar- og atvinnulífs.

Ritstjóri Óperublaðsins er Margrét Sveinbjörnsdóttir, yfirmaður markaðssviðs Íslensku óperunnar, og ábyrgðarmaður er Bjarni Daníelsson óperustjóri.