Fyrri tónleikarnir í nýrri tónleikaröð Óperunnar á vormisseri, Hádegisgestir, voru haldnir í gær, þriðjudaginn 4. febrúar. Það voru þær Kristín R. Sigurðardóttir sópransöngkona og Antonía Hevesi píanóleikari sem riðu á vaðið og fluttu sópranaríur undir yfirskriftinni Bergmál tilfinninga – frá Händel til Cilea.

Ríkarður Ö. Pálsson, tónlistargagnrýnandi Morgunblaðsins, hefur dóm sinn í blaðinu í dag á að lýsa ánægju sinni með það að í stað söngtexta í tónleikaskrá var ágripum varpað upp á myndarlegt tjald. Síðan skrifar Ríkarður: „Viðfangsefnin voru óperuaríur frá um 1740 til 1900 og hófust á O Jove in pity úr "Semele" Händels. Næst söng Kristín Come scoglio úr "Così fan tutte" og Io son l‘umile ancella úr "Adriana Lecouvreur" (Celea). Kirkjutónlistin kom við sögu í Inflammatus úr Stabat mater Rossinis. Puccini var tvíreifaður með Mi chiamano Mimi úr "La Bohème" og Signore ascolta úr "Turandot". Loks var Voi lo sapete úr "Cavalleria Rusticana" Mascagnis og pólónesuaría Elenu úr "I vespri Siciliani" eftir Verdi, Merce dilette amiche.

Þeim stöllum tókst í mörgu vel upp. Hevesi var fylgin og sveigjanleg í píanómeðleik. Kristín sýndi hér vaxandi tök á dramatískum viðfangsefnum; að vísu framan af með uggvænlega lausum fókus og einhæfri raddbeitingu. Þó lagaðist þéttleikinn töluvert í seinni hluta. Túlkunin varð um leið fjölþættari, með hápunktum í La Bohème og Turandot.“