Senn er komið að frumsýningu á Ástardrykknum í Íslensku óperunni, en hún fer fram í kvöld, sunnudaginn 25. október kl. 20. Þessi létta og skemmtilega ópera Donizettis segir frá hinum unga Nemorino og vinkonu hans Adinu, og sprenghlægilegum tilburðum þeirra við að ná saman. Inn í atburðarásina blandast síðan ástardrykkssalinn Dulcamara, herforinginn Belcore og vinkonan Giannetta, auk hóps þorpsbúa sem fylgist náið með því hvernig atburðarásinni vindur fram; bellibrögðunum sem skötuhjúin beita í viðleitni sinni, vandkvæðunum sem þeim síðan fylgja og hinni sönnu ást sem að lokum fær að blómstra.

Donizetti skrifaði Ástardrykkinn – L’elisir d’amore – árið 1832 og hefur hún síðan verið ein af vinsælustu óperum tónbókmenntanna. Til gamans má geta að hún verður sett upp í a.m.k. 33 óperuhúsum víðs vegar um heim á leikárinu 2009-2010.

Aðalhlutverkin í Ástardrykknum syngja Garðar Thór Cortes, Dísella Lárusdóttir, Bjarni Thor Kristinsson, Ágúst Ólafsson og Hallveig Rúnarsdóttir, en Þóra Einarsdóttir og Gissur Páll Gissurarson syngja einnig í sýningunni á sýningatímabilinu. Listrænir stjórnendur eru Ágústa Skúladóttir leikstjóri, Guðrún Öyahals leikmyndahönnuður, Katrín Þorvaldsdóttir búningahönnuður, Páll Ragnarsson ljósahönnuður og Daníel Bjarnason hljómsveitarstjóri, auk þess sem kór og hljómsveit Íslensku óperunnar tekur þátt í sýningunni.

Alls eru átta sýningar ráðgerðar á Ástardrykknum; 30. og 31. október og 7. ,8., 13., 15., og 20. nóvember og eru þær nánast allar uppseldar núna fáeinum dögum fyrir frumsýningu. Almennt miðaverð er 5.400 kr. og fá 25 ára og yngri 50% afslátt af miðaverði. Örfá sæti eru laus á frumsýninguna, en miðaverð á þá sýningu er 8.000 kr. og er enginn afsláttur veittur af miðum á frumsýningu.

Sýningin er styrkt af Orkuveitu Reykjavíkur.